PATI AKO, KINUKULIT na rin tungkol kina Dennis Trillo at Pauleen Luna kung talagang sila na raw ba.
Aba! Malay ko ba! Hindi ko naman pinapakialaman ang lovelife ng mga alaga ko. Ang huling narinig ko, mukhang nagpaparamdam pero ayaw naman lagyan ng ibang kahulugan iyon ni Pauleen dahil nu’n pa man ay close na sila.
Pero kung sakaling maging sila man, wala naman sigurong problema dahil matagal na palang break sina Dennis at Cristine Reyes at si Pauleen naman ay gusto na rin yatang magka-boyfriend uli.
Ayaw na lang kasi ni Pauleen magsalita dahil may Adik sa ‘Yo sila at si Jennica Garcia ang ka-loveteam du’n ni Dennis.
Nag-e-enjoy ang alaga ko sa Adik dahil magkasundo silang lahat at type na type niya ang role niya du’n. Kaya lang, ang dami nang nagsasabing mas bagay na ngayon sina Dennis at Pauleen. Minsan nga raw, nahahalatang si Pauleen pa rin ang type ni Dennis at hindi si Jennica na dapat ay du’n na siya ma-in love.
Sinasabihan ko na lang si Pauleen na huwag nang mag-comment sa isyu nila ni Dennis. Di ba dapat ang aktor ang magsalita? Kung may balak nga siyang ligawan si Pauleen, siya na ang magsalita. Pero kung gusto naman niyang sarilinin na lang at hindi na kailangang pag-usapan pa sa publiko, okay na rin iyun. Ang gusto ko lang namang linawin diyan, hindi nakikigulo si Pauleen, Nagtatrabaho lang siya nang maayos at nakikipagkaibigan sa mga katrabaho niya.
Itong ilang mga kaibigan daw ni Cristine ay kung anu-anong ikinakalat laban kay Pauleen. Si Cristine naman daw, mukhang hindi pa nakapag-move on sa break-up nila ni Dennis kaya kung anu-ano ang mga pinagsasabi. Pero mag-ingat siya dahil malinaw na hindi nakigulo si Pauleen sa relasyon nila noon. Problema nila ni Dennis iyun at walang kinalaman diyan si Pauleen.
Naku, ‘day! Malaman ko lang na may mga sinasabi iyang Cristine o mga alipores niya laban kay Pauleen, humanda siya!
KARARATING LANG NAMIN galing Singapore at habang nasa eroplano kami, kung anik-anik na tsismis ang naikukuwento sa akin ng mga katsikahan kong flight attendant.
Ang naloka ako ay tungkol kay Baron Geisler! Talagang kahit saan pala ito ay naglalasing. Walang raw itong ginawa sa eroplano kundi humingi nang humingi ng wine. Nalasing na raw ito sa kaiinom, gusto pa ring tumungga ng alak, pinagsabihan na ito ng flight attendant na hindi na puwede dahil lasing na ito.
Nakilala na kasi nila na masama ito pag nalasing at baka manggulo pa ito sa eroplano kaya hindi na ito binigyan ng alak.
Naku ha! Dapat may gagawin na dito si direk Maryo J. delos Reyes dahil hindi na maganda itong pinaggagawa niya.
Mabuti nga pinagtakpan na lang iyung huling gulong ginawa niya sa shooting sa Bohol. Si Aljur Abrenica pa ang nagmukhang masama du’n kaya dapat nang magsalita na si Aljur.
Mga Mata ni Lolita
by Lolit Solis
